My Neighbors kabanata 8-3

“Boboy, nakasusi ba itong pinto?” ani Liza na lumapit na sa front door. “O hindi natuloy sina Divie patungong Bulacan?”

“Natuloy sila, Liza,” sabi nitong binitiwan na ang palad ni Sammy at nakapamulsa ang mga palad na lumapit sa may likuran ni Liza. “Kasama pa nga si Mama, e.”

“Tado! Mama raw, o! Natatawang sinusian na niya ang pinto.”Kawawa ka naman, Boboy,” aniya. “Iniwan ka pala nila.”

“So what? Me lakad din naman ako mamaya. Pupuntahan ko’ng mga barkada ko sa Singalong.”

“Halika, sweetheart,” baling niya kay Sammy at palihim na kumindat dito. “Gusto mong magkape uli tayo, di ba?”

Tumango si Sammy. At nakangiting tumingin kay Boboy. “Nice to meet you, Bobby.”

“Same here, ‘Gineer,” ang sabi na pabirong sumaludo pa kay Sammy at tinungo na ang gate. “Split muna ‘ko. Enjoy yourselves. The house is empty and my neighbor is pretty…!”

“What?” natatawang sabi ni Sammy na sinundan ng tingin si Boboy hanggang sa gate.

“Nothing,” sabi nito at nakangiting lumingon. “What can you do if you can’t do anything? Nothing!”

Naiiling na sumunod na si Sammy kay Liza papasok sa apartment.

“INFATUATED talaga sa ‘kin ang batang yon, Sam,” pagpapaliwanag niya kay Sammy nang nagkakape na sila sa salas, magkatabi sa mahabang sopa. “Kinukulit ako at lagging dinigahan. Ayaw niyang maniwala na may nobyo na ‘ko. Kaya ngayon… kahit drama lang ang ginawa natin e maniniwala na siguro ‘yon. Pasensiya ka na sa ginawa ko.”

“It’s alright.”

“Titigil na siguro ‘yon sa pangungulit. It’s just a teenage infatuation.”

“Teenager pa ba yon?” ani Sammy. “Binata na ‘yon, a.”

“He’s just eighteen.”

Tumango si Sammy. “Kita mo? Maganda ka kasi, e. Marami ang mapapaibig mo just by being yourself.”

“Sammy, iba ang pag-ibig kaysa infatuation lang.”