My Neighbors kabanata 9-5

“PASENSIYA ka na nga pala uli sa pinsan ko sa ginawa niyang pambubulahaw kagabi, ha, Liza?” Natrapik sila sa isang interseksiyon sa Shaw Boulevard, patungo na sa trabaho kinabukasan, nang maalalang sabihin ni Rado. “Hiyang-hiya sa ‘yo ang loko. Panay ang iling nang magising kanina. Umiyak uli.”

Ngumiti si Liza nang magtama ang tingin nila ng binata sa pamamagitan ng overhead mirror. Pinahina naman ni Divie ang volume ng car stereo na ang radyo ay naka-tune-in sa isang FM station. Pagkuwa’y ipinatong nito ang isang palad sa kanang hita ng nobyo.

“Akala ko talaga’y biru-biro lang niya ‘yong madalas na pagsasabi sa ‘yo ng I love you, Liza,” ani Divie. “Talaga palang tinamaan siya sa ‘yo.”

“Infatuation lang ‘yon, Divie,” ani Liza.

“Sa palagay mo?”

“Oo naman.”

“Ano ba’ng sinabi sa ‘yo kagabi?” Pinaandar na uli ni Rado ang kotse. “Bakit gustung-gusto kang makita?”

“Hindi rin daw niya alam kung bakit,” aniya. “Basta nagsisikip daw ang dibdib niya.”

“Bugok talaga,” natatawang sabi ni Rado. “Akalain mong doon pa sa swing magbibigti? Niyayaya ko na nga sa bahay dahil ‘kako e mas maluwang do’n at mas mataas ang bubong, ayaw naman.”

Tawanan sila.

“Parang gusto ngang iuntog ang ulo sa dinding kanina, e,” sabi uli ni Rado. “Bakit daw gano’n ang naging akto niya kagabi? First time daw nangyari sa kanya yon, Liza.”

“Grabe palang magkagusto ‘yon, love,” ani Divie na tumingin kay Rado. “Ang inaalala ko e… paano kung malaman niya na hindi pala totoong magnobyo sina Liza at Sammy?”

“Oo nga, Rad,” ani Liza. “Baka magwala ‘yon. Baka sabihing ginago ko lang pala siya. Ano’ng gagawin ko?”

“Abay ewan ko sa ‘yo,” pabirong sagot ni Rado. “Problema mo na yan!”

“Rado naman, e!” Mangiyak-ngiyak na napakamot siya sa batok. “Problema mo rin ‘to dahil pinsan mo s’ya!”