My Neighbors kabanata 8-6

NAKATULOG siya nang makapananghalian ng tatlong crackers at isang hiwang pritong baka. Bandang alas-sais, nagising siya sa yugyog ni Divie. Nakabalik na ang mga ito mula sa San Jose Del Monte, Bulacan.

“Kakain na tayo,” sabi nitong umupo sa gilid ng kanyang kama. “‘Lika na…”

Nag-inat siya. “Bakit kasama pa ninyo si Tiya Lucy sa Bulacan?”

“Gusto raw niyang ma-meet ang mga partidos ko. Alam mo na… preparatory sa pangusisaan.”

“Oyyy… totohanan na talaga!. Kelan ba kayo pakakasal?”

“Matagal pa. Ayaw pa ni Daddy na mag-asawa ako, e. Good news nga pala. Pinapayagan ka ni Rado na maghapunan ng apat na talangkang isasawsaw sa sukang me sili, isang hiwang manggang hinog, isang tasang kanin at diet Coke.”

Napabalikwas siya ng bangon. “Talaga?”

“Oo. Halika na…”

Kinilig siya sa pananabik at agad kumalam ang kanyang tiyan. “Talangkang isasawsaw sa sukang me sili! O, sarappp…!”

Nauna pa siyang makalabas ng kanyang kuwarto. Kasunod niya sa hagdan ang natatawang kaibigan. Pero nang nasa ibaba na siya ay bigla siyang napaupo sa huling baitang at nangalumbaba.

“O, bakit?” kunot-noong lingon sa kanya ni Divie paglampas nito sa kanya. “Ano’ng problema?”

“Tama siguro kayo ni Rado, e,” aniya. “Ini-spoil ako ni Sammy. Kanina, tinukso na naman niya akong kumain kami ng goto pagkatapos kong magpakabusog sa fruit salad. Buti na lang, napaglabanan ko’ng sarili ko.”

Napamulagat si Divie. “Tarantado yon, a!”

“Oo nga. At binigyan pa ako ng isang mapulang rosas kanina. Hayan sa tokador ko, o. Unti-unti niya akong pinapaibig, Divie. Siguro nga e para makaganti sa yo.”

“Hindi ka naman gaga para magpasilo sa kanyang bitag, ‘no?” naniningkit ang mga mata at gigil na sabi ni Divie. “Bakit — natatakot ka bang ma-fall in love sa kanya?”

“No! On the contrary, nakakaramdam ako ng matinding galit. At gusto kong makipaglaro sa kanya.” Naningkit din ang mga mata niya sa galit at naibayo pa niya ang isang kamao sa palad. “Siya ang sisiluin ko sa bitag. Siya ang paiibigin ko! And let’s see who’s breaking whose heart a week or two from now. Pakisabi na lang ke Rad na salamat. Pero tatlong crackers lang at isang talangka ang kakainin ko ngayong gabi! No rice!”

“Sigurado ka?”

“Yes! B-but… can I make a r-request, Divie?”

“What?”

“Puwede bang ‘yong talangkang ibibigay n’yo sa akin e babae para me aligi?”

“Heh!”