My Neighbors kabanata 7-3

Tumingin ito kay Rado. “Totoo ba ‘yon, Kuya? Me nobyo na si Ate Li — este, si Liza?”

“Oo naman. At mas guwapo kesa sa ‘yo ‘yon.”

“Ano’ng pangalan?”

Si Divie ang nakangiting sumagot. “Engr. Sammy Cuervas.”

“Cuervas — ‘yong string para sa gitara?”

“Gago,” ani Rado. “Kuwerdas ‘yon, hindi Cuervas.”

Tawanan sila.

“Sorry, Liz,” ani Boboy. “Joke only. Tira na…”

“Wala akong maitira, Boboy,” aniya at ipinakita sa katabi ang kanyang tiles. Pinagdikit nila kanina pa ang dalawang maliliit na sopa para makapag-compare notes sila, wika nga. “What can you make out of these letters?”

“Letter r, k, e, t, y…” mahinang pagbabasa nito sa mga pitsa niya. “Hmmm… puwedeng ‘key.’ O kaya, dagdagan mo ng r para maging ‘keyr’.”

“Ow?” malakas niyang sabi. “Is there such a word?”

“Yes,” malakas din nitong sagot. “Take keyr because I keyr! O di ba?”

“Naku, Boboy—”

“Aha!” ani Divie. “Meron ka palang letter C, Eliza!”

Nagkatawanan na lamang sila ni Boboy at nag-high-five pa.

Napailing si Rado. “Parang sira ang dalawang ‘to! Nag-apir pa raw, o! Tira na, Liza!”

Hindi siya makatira pagkat tawa pa rin siya nang tawa. “Ikaw kasi, Boboy, ibinisto mong may letter C tayo!”

“Nabigla ako, e. Sorry.” Nagtatawang itinaas uli nito ang isang kamay. “Apir…” Nag-high-five uli sila.