My Neighbors kabanata 11-2

“A, gano’n?” ani Divie na galit na piningot ang isang tainga ng nobyo. “Para mo na ring kapatid ‘yannnn…um!”

“Aray ko, sweetheartl” ngiwi ni Rado. “Wala akong malisya do’n. Paghanga lang! Diyos ko naman… dumugo yata ang tainga ko, a!”

“Hee!” namumula pa ring irap ni Divie. “Talagang pare-pareho kayong mga lalaki… puro malisyoso!”

Tumingin si Rado kay Liza na parang humi-hingi sa kanya ng saklolo. “Liza, hindi ba’t kapag pabura-burara ang babae, talaga namang nakakaakit ng atensiyon?”

Sa halip na kampihan ay nakatawang sininghalan pa niya ito: “Tse! Hindi ako burara!”

“A, bahala kayo!” Natatawa ring itinuloy na ni Rado ang pagkain. “Sabi ko lang naman… huwag kayong sabay na magsusuot ng daster na magkapareho ang kulay, e…”

Nagkatinginan sila ni Divie. At sa ilang segundo’y parang malikmatang nakita nila ang sarili sa isa’t isa.

“Oo nga, ‘no?” anang kaibigan niya. “Para na nga pala tayong magkakambal ngayon!”

At nagkatawanan sila.

“Mga sira!” ani Rado na hindi malaman kung sisimangot o matatawa na rin.

NAPAKUNOT-NOO siya nang hindi makita sa salas at sa swing ang magnobyo pagkatapos niyang mahugasan ang pinagkanan. Pumanhik siya at pumasok na sa sariling kuwarto.

Nasaan kaya ang dalawang iyon? tanong niya sa sarili habang nagwo-workout sa stationary bike. A, nasa kabila lang siguro.

Pinapayagan na siya nina Divie at Rado na kumain nang regular basta lang daw patuloy siyang mag-iihersisyo gabi-gabi at magdya-jogging pa rin tuwing Linggo ng umaga.

Makaraan ang tatlumpung minutong pagba-bike, nanaog siya sa salas at nakinig ng musika sa stereo component. Pasado alas-otso na ng gabi. Maraming mapapanood na magagandang programa sa TV. Pero nang gabing iyon ay mas gusto pa niyang makinig na lamang ng musika mula sa isang FM station.

Nakahiga na sa mahabang sopa, pumikit siya at napangiti nang maalala si Sammy. Kaninang umaga ay nag-long distance sa kanya sa opisina ang binata. Natatawa siya ngayon habang binabalikan sa isip ang naging takbo ng kanilang pag-uusap.

I just want to play a game, Sammy boy!